ਟੁੱਟਿਆ ਕੀ - ਕੀ ਹੈ, ਟੁੱਟੇ ਸੁਪਨਿਆਂ ਦੇ ਨਾਲ-ਨਾਲ।
ਮੰਜ਼ਿਲਾਂ ਦਮ ਤੋੜ ਗਈਆਂ ਰਸਤਿਆਂ ਦੇ ਨਾਲ-ਨਾਲ।
ਪਾਰਦਰਸ਼ੀ ਹੋਣ ਦਾ ਵੀ ਖ਼ੂਬ ਮਿਲਿਆ ਹੈ ਇਨਾਮ,
ਝੋਲ ਮੇਰੀ ਭਰ ਗਈ ਹੈ ਟੁਕੜਿਆਂ ਦੇ ਨਾਲ-ਨਾਲ।
ਖ਼ਤਰਿਆਂ ਦੇ ਨਾਲ ਖੇਡਾਂ ਖੇਡਦੇ ਹੋਏ ਜਵਾਨ ,
ਵਰਚਣਾ ਵੀ ਸਿਖ ਲਿਆ ਹੈ ਸਦਮਿਆਂ ਦੇ ਨਾਲ-ਨਾਲ।
ਕਿੰਗਰੇ ਭੁਰ ਜਾਣ ਦੀ ਵੀ ਕੀ ਸਜ਼ਾ ਦਿੰਦੇ ਨੇ ਲੋਕ,
ਬਾਹਰ ਸੁਟ ਦਿੰਦੇ ਨੇ ਫੁਲ ਵੀ ਗ਼ਮਲਿਆਂ ਦੇ ਨਾਲ-ਨਾਲ।
ਮੀਲ ਪੱਥਰਾਂ ਦੀ ਕੋਈ ਸਾਜ਼ਿਸ਼ ਹੋਈ ਹੈ ਕਾਮਯਾਬ,
ਸੌਣ ਲੱਗੇ ਨੇ ਮੁਸਾਫ਼ਿਰ ਰਸਤਿਆਂ ਦੇ ਨਾਲ-ਨਾਲ।
ਡਾਢ੍ਹਿਆਂ ਸਮਿਆਂ ‘ਚ ਇਹ ਵੀ ਦਰਜ ਹੋਇਆ ਹੈ ਸਫ਼ਰ,
ਸ਼ੱਕ ਵੀ ਤੁਰਿਆ ਨਿਰੰਤਰ ਰਿਸ਼ਤਿਆਂ ਦੇ ਨਾਲ-ਨਾਲ।
ਪੀ ਕੇ ਸਾਗਰ ਵੀ ਅਜੇ ਤਕ ਆਫ਼ਰੇ ਨਾ ਉਹ ਜਨਾਬ?
ਸਾਨੂੰ ਪਰ ਪਰਚਾ ਰਹੇ ਨੇ ਤੁਪਕਿਆਂ ਦੇ ਨਾਲ-ਨਾਲ।
No comments:
Post a Comment